شَمَاخٍ ۔(الحلیمُ)۔
کتاب بصائر الدرجات میں مذکور ہے کہ سحر و جادو سے حفظ و امان میں رہنے کے لئے نماز شب سے فارغ ہونے کے بعد سات مرتبہ اسم مقدس”شماخ” پڑھیں ۔ نماز جمعہ کے بعد مسجد کے کسی خالی گوشہ میں بیٹھ کر اخلاص و یقین اور صدق دل کے ساتھ اسم متذکرہ الصدر کو دو سو مرتبہ پڑھیں جس مقصد کے لئے اس عمل کو کریں گے وہ یقیناً برآئے گا اور اگر اسی اسم مقدس کو کسی بیماری پر دس دفعہ دس دن بلا ناغہ پڑھیں تو اس سے شفائے کاملہ و عاجلہ نصیب ہوگی ۔
بصائر الدرجات میں لکھا ہے کہ اسم شماخ کو چینی کی طشتری پر مشک و زعفران کے ساتھ ایک سو دس مرتبہ لکھیں اور اسے دھو کر سل ودق کے مریض کو پلائیں تو وہ جلد صحتیاب ہوگا۔
لکھا گیا ہے کہ اسم شماخ کو جس دوا پر ۳۱۹ مرتبہ پڑھ کر دم کرکے وہ دوا جو مریض استعمال کرے گا وہ یقینی طور پر صحت پائے گا
اور اگر اسم متذکرہ الصدر کو مذکورہ بالا تعداد کے مطابق روزانہ تلاوت کرتا رہے گا تو ظاہری و باطنی امراض و عوارضات سے محفوظ رہے گا
کتاب مکارم الاخلاق میں تحریر ہے کہ اگر کھانا کھاتے وقت اس اسم مقدسہ کا ورد کرکے کھانا تناول کیا جائے تو وہ کھانا زہر آلود بھی ہوگا تو اسے کوئی گزند نہیں پہنچائے گا ۔
اگر کوئی عامل اس اسم مقدسہ کے پڑھنے میں مداومت کرے تو وہ آگ میں جلنے ، دریا میں غرق آب ہونے اور دشمنوں کے خوف سے امان میں رہے گا جسمانی صحت و حصول مرتبہ و جاہ کے لئے بھی یہ اسم مقدس بہت ہی نافع عمل ہے اس اسم مقدس کی ایک خاصیت یہ بھی ہے کہ اگر اسے دشمن کی زبان بندی کے لئے ہر روز ۱۸ مرتبہ پڑھا جائے تو اس مقصد کے لئے نہایت پرتاثیر ہے ۔
غم و الم میں مبتلا شخص اس اسم مقدس کو ایک ہزار مرتبہ پڑھے تو اس کا غم و الم جاتا رہے گا اور اگر پوشیدہ امور کے بھید جاننے کے لئے چالیس روز تک سولہ مرتبہ روزانہ پڑھیں تو علم لدنی کے اسرار و عجائبات سے واقف ہوجائیں گے ۔
